Handling

Forteljingar handlar ofte om ein person som manglar noko. Noko personen må prøva å skaffa seg. Heile forteljinga kan handla om det. Eksempel på kva ein person kan mangla :

• ein venn
• ein kjærast
• ein mordar (nokon er drepne)
• egg til pannekakerøra
• pengar
• eit toalett
• eit kjæledyr
• vegen heim (har rota seg vekk)
• nøklane til huset
• ein god idè til ei forteljing

Forteljingar handlar og om ein person som har for mykje av noko. Noko personen må prøva å kvitta seg med. Eksempel på kva ein person kan ha for mykje av :

• ein uvenn
• ein klengete person som trur det er kjærleik med i bildet
• eit lik (nokon er drepne)
• egg (høna legg trehundreogåtte egg til dagen)
• pengar (han er vel ein tjuv då ?)
• toalett (alle rom i huset er toalett?)
• eit kjæledyr (det viste seg å vera ein dinosaurbeibi)
• for mange gode idèar til forteljingar

Forteljingar handlar om personar som skal redda verden. Den mest berømte er forteljinga om Jesus. Nokre andre er:

• Tarzan
• Fantomet
• James Bond

Forteljingar handlar om ein person som har fått ei mindre oppgåve enn å redda verden, men som likevel er vanskeleg nok. For eksempel :

• Greier han å sløkka brannen ?
• Greier ho å temma den ville hesten?
• Greier ho å få mora til å forstå at ho må ha ei gul bukse?

Vil du at forteljinga skal vera spennande er det 2 ting som kan vera lure å hugsa på :

1. Det må vera vanskeleg for personen å få det til. Dess vanskelegare dess meir spenning.
2. Det må hasta. Dess dårlegare tid dess meir spenning.

Det mest spennande spørsmålet pleier likevel å vera dette :
Får dei kvarandre til slutt ?